16 fevral 1996-cı ildə Azərbaycan Prezidenti Heydər Əliyev Bakıda ilkin neftin Rusiya ərazisi vasitəsilə nəqli haqqında sazişlərin imzalanması mərasimində iştirak edib.
1994-cü ilin sentyabrında Xəzərin Azərbaycan sektorunda yerləşən yataqların xarici neft şirkətləri ilə birgə işlənməsi haqqında sazişin - "Əsrin müqaviləsi"nin imzalanmasından sonra ilkin nefti dünya bazarlarına çatdıracaq əlverişli neft boru kəmərinin çəkilməsi məsələsi gündəmə gəlib. Keçən əsrin 90-cı illərində ilkin Azərbaycan neftinin Rusiya ərazisi ilə Qara dəniz sahilində yerləşən Novorossiysk limanına, oradan bərə vasitəsilə daha uzaq məntəqələrə daşınması real görünürdü. Belə ki, hələ keçmiş SSRİ dövründə Novorossiysk-Bakı boru kəməri fəaliyyət göstərirdi. Bu kəmər Rusiyada hasil edilən xam neftin Bakının neftayırma zavodlarında emal etmək məqsədilə inşa edilib və SSRİ dağıldıqdan sonra istifadəsiz qalıb. Bu boru kəmərinin bərpa edilərək neftin əks istiqamətdə ötürülməsi üçün 1995-ci ilin oktyabrın 9-da qərar qəbul edilib, Azərbaycan və Rusiya hökumətləri arasında danışıqlar başlanıb.
Danışıqların nəticəsində razılıq əldə edildikdən sonra ilkin Azərbaycan neftinin Bakı-Novorossiysk boru kəməri vasitəsilə nəqlinə dair müqaviləni 18 yanvar 1996-cı ildə Moskvada Azərbaycan Prezidenti Heydər Əliyev və Rusiya Federasiyasının baş naziri Viktor Çernomırdin imzalayıb.
16 fevral 1996-cı ildə isə Bakıda Bakı-Novorossiysk neft boru kəmərinin inşası və fəaliyyətə başlaması üçün lazım olan texniki-iqtisadi öhdəlikləri özündə əks etdirən sənədlərin imzalanması mərasimi olub. Bu sənədlər neftin nəql edilməsinə yardım haqqında müqavilə, habelə Azərbaycanda çıxarılacaq ilkin neftin Rusiya ərazisi vasitəsilə nəqli haqqında sazişdən ibarət idi. Həmin sənədlər neftin Novorossiysk limanına çatdırılmasına dair vəzifələrin yerinə yetirilməsi sahəsində tərəflərin öz üzərlərinə götürdükləri hüquqi, kommersiya, maliyyə və iqtisadi öhdəlikləri əhatə edirdi.
Sənədləri Rusiya tərəfindən "Transneft" Səhmdar Cəmiyyətinin prezidenti Valeri Çernyayev, Azərbaycan tərəfindən Azərbaycan Dövlət Neft Şirkətinin prezidenti Natiq Əliyev, xarici neft şirkətləri tərəfindən isə Azərbaycan Beynəlxalq Əməliyyat Şirkətinin prezidenti Terri Adams imzalayıb. Kəmərin çəkilişi ilə bağlı qarşılıqlı memorandumu isə Azərbaycan tərəfindən ARDNŞ prezidenti Natiq Əliyev, Rusiya tərəfindən "LUKoyl" neft şirkətinin prezidenti Vahid Ələkbərov imzalayıb.
Bakı-Novorossiysk neft boru kəməri Azərbaycan neftini Rusiya ərazisi ilə 1997-ci ilin noyabrından xarici bazara çıxarmağa başlayıb. İllik ötürmə qabiliyyəti 17 milyon ton, uzunluğu 1411 km olan bu neft kəmərinin çəkilməsinə 600 milyon ABŞ dolları məbləğində sərmayə qoyulub.
Azərbaycan neftinin dünya bazarlarına çıxarılmasında alternativ boru kəməri kimi çıxış edən Bakı-Novorossiysk kəməri vasitəsilə hər il bir neçə milyon ton xam neft dünya bazarına nəql edilir.Bu neft kəməri vasitəsilə 2005-ci ildə 4,1 milyon, 2006-cı ildə 4,6 milyon, 2007-ci ildə 2,1 milyon, 2008-ci ilin birinci yarım ili ərzində isə 0,6 milyon ton Azərbaycan nefti dünya bazarlarına çatdırılıb. (http://www.az-customs.net/)
Qeyd edək ki, hazırda Azərbaycanda hasil edilən xam neftin əsas hissəsi 2006-cı ildən fəaliyyətə başlayan Bakı-Tbilisi-Ceyhan əsas ixrac boru kəməri vasitəsilə dünya bazarlarına nəql edilir. Məsələn, 2007-ci ildə Azərbaycanda 42,6 milyon ton neft hasil olunub və ixrac üçün nəzərdə tutulan neftin 27,5 milyon tonu Bakı-Tbilisi-Ceyhan marşrutu ilə ixrac edilib. (http://www.az-customs.net/)
Mərasimdə çıxış edən Azərbaycan Prezidenti Heydər Əliyev xarici neft şirkətləri tərəfindən Azərbaycanda hasil edilən ilkin neftin ixracını təmin edəcək boru kəmərini həm milli iqtisadiyyatın inkişafı, həm də regional əməkdaşlığın genişləndirilməsi baxımından böyük əhəmiyyətə malik layihə kimi qiymətləndirib.
Tarixi arayış 23 iyul 2008-ci ildə tərtib edilib.